按：张小村、赵朴斋同行，至宝善街悦来客栈门首。朴斋道：“我去一埭就来，耐等一歇。”小村笑而诺之，独自回栈。栈使开房点灯冲茶，小村自去铺设烟盘过瘾，吸不到两口烟，赵朴斋竟回来了。小村诧异得很，问其如何。朴斋叹口气道：“（要勿）说起！”便将陆秀宝要打戒指一切情节仔细告诉小村，并说：“我故歇去，就来里棋盘街浪望仔一望，望到俚房间里来哚摆酒、豁拳、唱曲子，闹爇得势。想来就是姓施个客人。”小村笑道：“我看起来还有道理。耐想，今朝一日天就有客人，阿是客人等好来哚？无拨实概凑巧（口宛）！耐去上仔俚哚当水哉！姓施个客人末总也是上当水。耐想阿对？”

    朴斋恍然大悟，从头想起，越想越像，悔恨不迭。小村道：“难也（要勿）去说俚哉。以后耐（要勿）去仔末才是哉！我也正要搭耐说：我有一头生意来哚，就是十六铺朝南大生米行里，我明朝就要搬得去。我去仔，耐一干子住来里栈房里，终究勿是道理。最好末耐原转去，托朋友寻起生意来再说。勿然就搬到耐哚娘舅店里去，倒也省仔点房饭钱。耐说阿是？”朴斋寻思半晌，复叹口气道：“耐生意倒有哉，我用脱仔多花洋钱，一点点勿曾做啥。”小村道：“耐要来里上海寻生意，倒是难囗。就等到一年半载，也说勿定寻得着寻勿着。耐先要自家有主意，（要勿）隔两日用完仔洋钱，勿过去，拨来耐哚娘舅说，阿是无啥意思？”

    朴斋寻思这话却也不差，乃问道：“耐噪碰和，一场输赢要几花嗄？”小村道：“要是牌勿好，输起来，就二三百洋钱也无啥希奇囗。”朴斋道：“耐输仔阿拨俚哚？”小村道：“输仔阿好勿拨嗄。”朴斋道：“陆里来几花洋钱去拨俚？”小村道：“耐勿晓得。来里上海场花，只要名气做得响末就好。耐看仔场面浪几个人，好像阔天阔地，其实搭倪也差勿多，不过名气响仔点。要是无拨仔名气，阿好做啥生意吸？就算耐屋里向该好几花家当来里，也无用（口宛）！耐看吴松桥，阿是个光身体？俚稍微有点名气末，二三千洋钱手里豁出豁进，无啥要紧。我是比勿得俚，价末要有啥用场，汇划庄浪去，四五百洋钱也拿仔就是。耐陆里晓得嗄！”朴斋道：“庄浪会拿仔末，原要还个（口宛）。”小村道：“故末也要自家算计哉囗。生意里借转点，碰着法有啥进益，补凑补凑末还脱哉。”朴斋听他说来有理，仍是寻思不语。须臾各睡。

    次早十九日，朴斋醒来，见小村打叠起行李，叫栈使喊小车。朴斋忙起身相送，送至大门外，再三嘱托：“有啥生意，搭我吹嘘吹嘘。”小村满口应承。

    朴斋看小村押着小车去远，方回栈内。吃过中饭，正要去闲游散问，只见聚秀堂的外场手持陆秀宝名片来请。朴斋赌气，把昨夜头一个局钱给他带回，外场那里敢接。朴斋随手撩下，望外便走。外场只得收起，赶上朴斋，说些好话。朴斋只做不听见，自去四马路花雨楼顶上泡一碗茶，吃过四五开，也觉没甚意思，心想陆秀宝如此无情，倒不如原和王阿二混混，未始不妙。当下出花雨楼，朝南过打狗桥，径往法界新街尽头，从明王阿二门口，直上楼去，房间里不见一人。

    正在踌躇想要退下，不料一回身，王阿二捏手捏脚跟在后面，已到楼门口了。喜的朴斋故意弯腰一瞧，道：“咦！耐阿是要来吓我？”王阿二站定，拍掌大笑道：“我来哚间壁郭孝婆搭，看见耐低倒仔头只管走，我就晓得耐到倪搭来，跟来耐背后。看耐到仔房间里，东张张，西张张，我末来里好笑，要突出来哉呀！”朴斋也笑道：“我想勿到耐就来里我背后，倒一吓。”王阿二道：“阿是耐勿看见？眼睛大得来！”

    说话时，那老娘姨送上烟茶二事，见了朴斋笑道：“赵先生，恭喜耐哉（口宛）！”朴斋愕然道：“我有啥喜嗄？”王阿二接嘴道：“耐算瞒倪阿是？勿可帐倪倒才晓得个哉。”朴斋道：“耐晓得哈囗？”王阿二不答，却转脸向老娘姨道：“耐听俚，阿要惹人气！倒好像是倪要吃醋，瞒仔倪。”老娘姨呵呵笑道：“赵先生，耐说末哉。倪搭勿比得堂子里，耐就去开仔十个宝也匆关倪啥事，阿怕倪二小姐搭俚哚去吃醋？倪倒有几几花花醋哚，也吃勿得陆里搭好（口宛）！”

    朴斋听说，方解其意，笑道：“耐叹说陆秀宝，我只道仔耐哚说我有仔啥生意了恭喜我。”王阿二道：“耐有生意无生意，倪陆里晓得嗄。”朴斋道：“价末陆秀宝搭开宝，耐倒晓得哉。故是张先生来搭耐叹说个（口宛）。”老娘姨道：“张先生就搭耐来仔一埭，以后匆曾来歇。”王阿二道：“张先生是勿来哉。我搭耐说仔罢，倪搭用好包打听来里，阿有啥勿晓得？”朴斋道：“价末昨日夜头是啥人住来哚陆秀宝搭，耐阿晓得？”王阿二努起嘴来道：“哪！是只狗哉囗。”被朴斋一口啐道：“我要是住来哚末，也勿来问耐哉（口宛）！”王阿二冷笑道：“（要勿）塔我瞎说哉！开宝客人住仔一夜天，就匆去哉，耐骗啥人嗄！”朴斋叹口气，也冷笑道：“耐哚包打听阿是个聋甏？教俚去喊个剃头司务拿耳朵来作作清爽，再去做包打听末哉。”王阿二听说，知道是真情了，忙即问道：“阿是耐昨日夜头匆来哚陆秀宝搭？”朴斋遂将陆秀宝如何倡议，如何受欺，如何变卦，如何绝交，前后大概略述一遍。

    那老娘姨插口说道：“赵先生，也要算耐有主意哚，倒拨来耐看穿哉。耐阿晓得，倌人开宝是俚哚堂子里口谈（口宛），陆里有真个嗄，差勿多要三四转五六转哚。耐末豁脱仔洋钱，再去上俚哚当水，啥犯着嗄？”王阿二道：“早晓得耐要去上俚哚当水末，倪倒勿如也说是清倌人，只怕比仔陆秀宝要像点哚。”朴斋嘻嘻的笑道：“耐前门是匆像哉，我来搭耐开肉后门走走，便当点阿好？”王阿二也不禁笑道：“耐个人啊，拨两记耳光耐吃吃末好！”老娘姨随后说道：“赵先生，耐也自家勿好。耐要听仔张先生闲话，就来里倪搭走走，勿到别场花去末，倒也匆去上俚哚当水哉。像倪搭阿有啥当水来拨耐上嗄？”朴斋道：“别场花是我也无拨，陆秀宝搭勿去仔，就不过该搭来走走。前几日我心里要想来，为仔张先生，倘忙碰着仔，好像有点难为情。难是张先生搬得去哉，也勿要紧哉。”

    王阿二忙即问道：“阿是张先生寻着仔生意哉？”朴斋遂又将张小村现住十六铺朝南大生米行里的话，备达一遍。那老娘姨又插口说道：“赵先生，耐忒啥胆小哉。（要勿）说啥张先生倪搭匆来，就算俚来仔碰着耐来里，也无啥要紧（口宛）。有辰光倪搭客人合好仔三四个朋友一淘来，才是朋友，才是客人，俚哚也算闹爇点好白相；耐看见仔要难为情杀哉！”王阿二道：“耐末真真是个铲头！张先生就是要打耐末，耐也打得过俚（口宛），怕俚啥嗄？要说是难为情，倪生意只好（要勿）做哉。”

    朴斋自觉惭愧，向榻床躺下，把王阿二装好的一口烟，拿过枪来，凑上灯去要吸，吸的不得法，焰腾腾烧起来了。王阿二在傍看着好笑。忽听得间壁郭孝婆高声叫：“二小姐。”王阿二慌的令老娘姨去看：“阿有啥人来哚？”老娘姨赶紧下楼。朴斋倒不在意，王阿二却抬头侧耳细细的去听。只听得老娘姨即在自己门前和人说话，说了半晌，不中用，复叫道：“二小姐，耐下来囗。”恨得王阿二咬咬牙，悄地咒骂两句，只得丢了朴斋，往下飞奔。

    朴斋那口烟原没有吸到底，也就坐起来听是什么事。只听得王阿二走至半楼梯，先笑叫道：“长大爷，我道是啥人！”接着咕咕唧唧更不知说些甚话，听不清楚。只听得老娘姨随后发急叫道：“徐大爷，我搭耐说唱”这一句还没有说完，不料楼梯上一阵脚声。早闯进两个长大汉子。一个尚是冷笑面孔；一个竟揎拳攘臂，雄纠纠的据坐榻床，扌若起烟枪，把烟盘乱搠，只嚷道：“拿烟来！”王阿二忙上前陪笑道：“娘姨来哚拿来哉。徐大爷（要勿）动气。”

    朴斋见来意不善，虽是气不伏，却是惹不得，便打闹里一溜烟走了，王阿二连送也不敢送。可巧老娘姨拿烟回来，在街相遇，一把拉住嘱咐道：“日里向人多，耐夜头一点钟再来，倪等来里。”朴斋点头会意。

    那时太阳渐渐下山。朴斋并不到栈，胡乱在饭馆里吃了一顿饭，又去书场里听了一回书，捱过十二点钟，仍往王阿二家，果然畅情快意，一度春宵。

    明日午前回归栈房，栈使迎诉道：“昨夜有个娘姨来寻仔耐好几埭哚。”朴斋知道是聚秀堂的杨家（女每），立意不睬。惟恐今日再来纠缠，索性躲避为妙。一至饭后，连忙出门，惘惘然不知所往。初从石路向北出大马路，既而进抛球场，兜了一个圈子，心下打算，毕竟到那里去消遣消遣；忽想起吴松桥等碰和一局，且去孙素兰家问问何妨。因转弯过四马路，径往兆贵里孙素兰家，只向客堂里问：“吴大少爷阿来里？”外场回说：“勿曾来。”朴斋转身要走，适为娘姨金姐所见。因是前日一淘碰和的，乃明白告道：“阿是问吴大少爷？俚哚来里尚仁里杨媛媛搭碰和，耐去寻末哉。”

    朴斋听了出来，遂由兆贵里对过同庆里进去，便自直通尚仁里。当并寻着了杨媛媛的条子，欣然抠衣踵门，望见左边厢房里一桌碰和，迎面坐的正是张小村。朴斋隔窗招呼，踅进房里。张小村及吴松桥免不得寒暄两句，李鹤汀只说声“请坐”，周少和竟不理。赵朴斋站在吴松桥背后，静看一回，自觉没趣，讪汕告辞而去。

    李鹤汀乃问吴松桥道：“俚阿做啥生意？”松桥道：“俚也出来白相相，无啥生意。”张小村道：“俚要寻点生意，耐阿有啥路道？”吴松桥嗤的笑道：“俚要做生意！耐看陆里一样生意末俚会做嗄？”大家一笑丢开。

    比及碰完八圈，核算筹码，李鹤汀仍输百元之数。杨媛媛道：“耐例会输哚，我匆曾听见耐赢歇（口宛）。”吴松桥道：“碰和就输煞也匆要紧，只要牌九庄浪四五条统吃下来末，好哉（口宛）。”周少和道：“吃花酒无啥趣势，倒勿如尤如意搭去翻翻本看。”李鹤汀微笑道：“尤如意搭，明朝去末哉。”张小村问道：“啥人请耐吃酒？”李鹤汀道：“就是黎篆鸿，勿然啥人高兴去吃花酒。俚也匆请哈人，单是我搭四家叔两家头。要拆仔俚冷台，故是跳得来好白相煞哉！”吴松桥道：“老老头倒高兴哚。”李鹤汀正色道：“我说倒也是俚本事。耐想囗，俚屋里未几花姨太太，外头末堂子里倌人，还有人家人，一榻括仔算起来，差勿多几百哚！”周少和道：“到底阿有几花现银子？”李鹤汀道：“啥人去搭俚算嗄，连搭俚自家也有点模糊哉。要做起生意来，故末叫爇昏搭仔邪，几千万做去看，阿有啥陶成！”大家听了，摇头吐舌，赞叹一番，也就陆续散去。

    李鹤汀随意躺在榻床上，伸了个懒腰，打了个呵欠。杨媛媛问：“阿要吃筒鸦片烟？”鹤汀说：“（要勿）吃。昨日闹仔一夜天，今朝勿曾因醒，懒朴得势。”媛媛道：“昨日去输仔几花嗄？”鹤汀道：“昨日还算好，连配仔两条就停哉，价末也输千把哚。”媛媛道：“我劝耐少赌赌末哉。难为仔洋钱，还要糟蹋身体。耐要想翻本，我想俚哚人赢末倒拿仔进去哉，输仔勿见得再拿出来拨来耐哉囗。”鹤汀笑道：“故是耐瞎说。先拿洋钱去买得来筹码，有筹码末总有洋钱来除，阿有啥拿匆出？就怕翻本翻勿转，庄浪风头转仔点，俚哚倒勿打哉，赢勿动俚，无法仔！”媛媛道：“原是（口宛）。我说耐明朝要到尤如意搭去，算好仔几花输赢，索性再赌一场，翻得转末翻仔，翻勿转就气输仔罢哉。”鹤汀道：“故末勿差。倘然翻勿转，我定规要戒赌哉。”媛媛道：“耐能够戒脱仔勿赌，故是再好也匆有。就是要赌末，耐自家也留心点，像实概几万输下去，耐末倒也无啥要紧，别人听见仔阿要发极嗄？耐哚四老爷要问起倪来为啥勿劝劝囗，倪倒吃仔俚闲话，也只好勿响（口宛）。”鹤汀道：“故是无价事个，四老爷勿说我倒来说耐？”媛媛道：“故歇说闲话个人多，例说勿定（口宛）。其实倪搭是耐自家高兴赌仔两场，闲人说起来，倒好像倪挑仔几花头钱哉。倪堂子里勿是开啥赌场，也（要勿）挑啥头钱（口宛）。”鹤汀道：“啥人来说耐嗄，耐自家来哚多心。”媛媛道：“难耐到尤如意搭去赌末哉；故末有啥闲话，也匆关倪事。”

    说话时，鹤汀已自目饧吻沥，微笑不言，媛媛也就剪住了。当下鹤汀朦胧上来，竟自睡去。媛媛知他欠困，并不声唤，亲自取一条绒毯替他悄地盖上。鹤汀直睡至上灯以后，娘姨盛姐搬夜饭进房，鹤汀听得碗响即又惊醒。杨媛媛问鹤汀道：“耐阿要先吃仔口，再去吃酒？”鹤汀一想，说道：“吃是倒吃勿落，点点也无啥。”盛姐道：“无拨啥小菜（口宛），我去教俚哚添两样。”鹤汀摇手道：“（要勿）去添，耐搭我盛一口口干饭好哉。”媛媛道：“俚乃喜欢糟蛋，耐去开仔个糟蛋罢。”盛姐答应，立刻齐备。

    鹤汀和媛媛同桌吃毕，恰值管家匡二从客栈里来，见鹤汀禀说：“四老爷吃酒去哉，教大少爷也早点去。”媛媛道：“等俚哚请客票头来仔了去，正好（口宛）。”鹤汀道：“早点去吃仔，早点转去困觉哉。”媛媛道：“耐身向里有点勿舒齐末，原到倪搭来，比仔栈房里也适意点哚。”鹤汀道：“两日勿曾转去，四老爷好像有点勿放心转去个好。”媛媛也无别语。李鹤汀乃叫匡二跟着，从杨媛媛家出门赴席。

    第十四回终。

　　请记住本书首发域名：www.llskw.org。来奇网电子书手机版阅读网址：m.llskw.org